Idee per Packaging
News » Articoli dello Scatolino » Furlans: autonomiscj platonics

Furlans: autonomiscj platonics

2000px-Bandiere_dal_Friûl.svg

“La stilografiche di Marchet” a cura di William Cisilino

Furlans: autonomiscj platonics

I friulani spesso si lamentano – quasi sempre in osteria – della situazione politica del bistrattato Friuli, senza considerare che essi stessi sono la causa prima delle proprie sventure. Negli oltre cinquant’anni di Regione autonoma, hanno preferito dare fiducia ai partiti italiani, anziché percorrere la strada di una alternativa di governo autonomista. Riproponiamo qui una riflessione sul tema del grande friulanista Giuseppe Marchetti (nato a Gemona del Friuli il 23 luglio 1902 e scomparso a Udine l’8 maggio 1966), apparsa sulla “Patrie dal Friûl” nel 1947. Un articolo pungente, a tratti corrosivo, ma sicuramente sincero e ancora attuale. Buona lettura! William Cisilino A Rome la Costituent e à, pe prime volte, disfate une leç che e veve fate za cualchi mês: l’articul 108 ch’al meteve il Friûl tal numar des Regjons par cont so, ma sot di chê molene che si clame l’autonomie normâl. 

O regjistrìn cheste scopule che nus è capitade, cence cirî di scuindi cetant fuarte che e je: o fasìn par dî ch’o intindìn benon il valôr di chel «provisoriamentri», ch’a’ndi vûl tant pocjis doman a passâi parsore un colp di spugne. Il centralisim roman, ch’al torne ogni dì plui a rinfrancjâsi, lu à metût li cun chê intenzion. O savevin che ancje i difensôrs de camore burocratiche sparniçâts pe Furlanie a vevin divisât di molâ il lôr colp cuant che al sarès vignût il moment di stabilî il numar des Regjons: ma si vin un fregul lusingâts che la Costituent e fos une cjosse avonde serie par rispietâ la legalitât dai siei procediments e par no disdî vuê ce che à dit îr.

No fasarìn coments su chest cont par vie che un articul de Costituzion, formulât chê altre dì, al proibìs il «vilipendio» cuintri la supreme «assise» de republiche. (Chel sì al è un articul ch’al coventave e che nissun cirarà di rimangjâlu: Di’ vuardi!). Anzit o fasarìn di miei: o ricognossarìn che l’Assemblee romane e à vût un pont di reson. Par fâ une ilegalitât di cheste fate, e à tirade fûr la scuse che il popul furlan nol domande ordenaments speciâi, anzit al è contrari. Vualtris, amîs, o saveis cetant che e je vere cheste... veretât. Ma chel... Cudignele che, prin di ducj, le à butade fûr, e la grande part dai onorevui che le àn fate buine, ce savevino? I nestris onorevui, che a savevin alc, a jerin chenti a passâ l’ore là dal Jeur o in altris sîts.

A Rome e jere rivade une sglavinade di mozions e di protestis, di telegrams e di o.d.g. che a valevin juste lis spesis di pueste, ma chei di là vie a sintin il pols dal Paîs cussì. De bande nestre di chest matereâl a’ndi jere rivât vie pôc, ancje parcè che i furlans a son, sì, autonomiscj, almancul il nonante par cent, ma no metin man al tacuin nancje par bati un telegram. Lôr a son autonomiscj platonics: a spietin che l’autonomie ur capiti jù pe cope, che ur e regalin sore grazie.

Lôr a sperin che Rome, la centrâl de mangjarie burocratiche, la cucagne dai cavalîrs e dai comendatôrs di mieç in jù, si gjavi di bessole il fen di bocje par amôr de Furlanie. Al ven a stâi che chel dîs par cent di masse svelts o di masse gnognos che a son contraris, a son contraris pardabon, e pe lôr cause a lavorin, si remenin, a spindin; e chei nonante par cent che a son a favôr a stan a viodi cemût che e va, cui braçs in crôs, cence movi un dêt o spindi un centesin par judâ a tignîle sù.

Ese marivee se a Rome si crôt — o si fâs fente di crodi — che il popul furlan al rifude il regâl che i vevin fat o almancul no si romp nancje a dî grazie? Si puedial lamentâsi che e sedi stade fate cheste ilegalitât, che infin dai conts e risulte democraticamentri justificade di cui sa centatis statistichis? Il mont nol è fat pai indurmidîts. Cumò o sin a chest pont: o ch’al nas un fat gnûf ch’al basti a fâ capî a chei di là jù ce ficjasse che a àn fate, e cuale che e je la vere volontât, la vere necessitât dai furlans; o che, di chi a trê-cuatri mês la Costituent e tire un sfrìs su chel «provisoriamentri» e ancje cheste biele ocasion che si veve di alçâ il cjâf di sot il jôf e sarâ lade a trai.

O seguitarìn a mantignî une sdrume di mangje-cjartis, a paiâ tassis par che e vegni risanade la «Cuistion dal Meridion», a inçopedâsi ogni pît alçât in cualchi sarasin, a strissinâ fagots par dut il mont, par fâ puest ai parons d’importazion, a cjantâ, fin che nus al permetaran «Oh ce biel cjiscjel a Udin», a imbastardîsi fintremai che i cucs a podaran freâsi lis mans parcè che la malandrete semence dai furlans e sarà piardude, l’unitât (!) spirituâl e sarà fate, e cheste tiare e sarà deventade une provincie di teronie. Il fat gnûf al podarès jessi chest culì: che chel nonante par cent di furlans che si diseve, sot di cheste gnespule si dismovès, si unìs di fûr di ducj i partîts — parcè che dai partîts nol è mai di infidâsi: a manovrin la barcje seont la buere che e sofle par lôr — al alçàs la vôs, al metès adun la volontât, l’ativitât e ancje, se al covente, chel pedoglôs di un tacuin e al des man fuarte a chei pôcs che a piardin timp, flât, sudôr e interès in cheste campagne, par smascarâ e stringhiâ come cu va tante cragne stomeose che e fermente sot lis patriotichis bandieris dai aversaris... Ma lu vin dit tantis voltis e simpri dibant.

E alore a àn reson lôr: i furlans no bazilin di dispedoglâsi; e cussì mo che si russin.

Pre Josef Marchet

YouTube

Links utili

Downloads

LO_SCATOLINO_n_21 (1,97 MB)
LO_SCATOLINO_n_20 (1,62 MB)
LO_SCATOLINO_N_19 (2,87 MB)
Lo scatolino 18 (0,97 MB)
lo_scatolino_17 (1,22 MB)
Realizziamo le tue idee
Telefono
Richiedi un preventivo